Tanzania Broadcasting Corporation - (TBC)

Mkuu wa mkoa wa Arusha Magessa Mulongo amewaomba viongozi wa dini kuiombea taifa liepukane na wenye tamaa  ya madaraka ili kulinusuru taifa lisiingie kwenye machafuko bila sababu za msingi.

Mulongo ameyasema hayo katika ibada maalumu ya kusimikwa kitini kwa Askofu Hotay kuwa Askofu wa dayosisi ya Mlima Kilimanjaro kwenye kanisa la Christ Church Jijini Arusha.

Akitoa salamu za serikali katika ibada hiyo Mulongo ameelezea kusikitishwa kwake  na tabia iliyoibuka miongoni mwa Watanzania kwa kila mmoja kutaka kuwa kiongozi au  Rais kwa kumvunja vunja na kumkwamisha Rais aliyeoko madarakani.

Naye  Mkuu wa Kanisa Anglikana nchini, Askofu  Dk Valentino  Mokiwa akihubiri kwenye ibada hiyo ametangaza msamaha kwa waumini watatu  waliofungua kesi kumpinga Askofu Stanley  Hotay  kusimikwa na kuwaasa kurejesha imani yao kwa kanisa.

Kwa upande wake Askofu  Stanley Hotay  aliungana na kauli ya Askofu Mkuu Dk Mokiwa  kwa kutangaza msamaha kwa wote waliompinga na kuwaomba waanze maisha mapya kwa kutumia akili zao  kwa lengo la kutangaza utukufu na ufalme wa Mungu badala ya kulumbana kwa utumishi wa kiroho.

Ibada hiyo ya kumsimika Askofu Hotay imefanyika baada ya  Mahakama kuu Kanda ya ARUSHA  kutupilia mbali pingamizi ililowekwa na waumini watatu wa kanisa hilo.

Khalifa Mshana, TBC Arusha.